v. 1 : Factum est autem post haec, ut percuteret David Philisthiim, et humiliaret eos, et tolleret Geth et filias eius de manu Philisthiim,
v. 2 : percuteretque Moab, et fierent Moabitae servi David, offerentes ei munera.
v. 3 : Eo tempore percussit David etiam Adarezer regem Soba regionis Hemath, quando perrexit ut dilataret imperium suum usque ad flumen Euphraten.
v. 4 : Cepit ergo David mille quadrigas eius, et septem millia equitum, ac viginti millia virorum peditum, subnervavitque omnes equos curruum, exceptis centum quadrigis, quas reservavit sibi.
v. 5 : Supervenit autem et Syrus Damascenus, ut auxilium praeberet Adarezer regi Soba: sed et huius percussit David viginti duo millia virorum.
v. 6 : Et posuit milites in Damasco, ut Syria quoque serviret sibi, et offerret munera. Adiuvitque eum Dominus in cunctis ad quae perrexerat.
v. 7 : Tulit quoque David pharetras aureas, quas habuerant servi Adarezer, et attulit eas in Ierusalem.
v. 8 : Necnon de Thebath et Chun urbibus Adarezer aeris plurimum, de quo fecit Salomon mare aeneum, et columnas, et vasa aenea.
v. 9 : Quod cum audisset Thou rex Hemath, percussisse videlicet David omnem exercitum Adarezer regis Soba,
v. 10 : misit Adoram filium suum ad regem David, ut postularet ab eo pacem, et congratularetur ei quod percussisset et expugnasset Adarezer: adversarius quippe erat Thou Adarezer.
v. 11 : Sed et omnia vasa aurea, et argentea, et aenea consecravit David rex Domino, cum argento et auro quod tulerat ex universis gentibus, tam de Idumaea, et Moab, et filiis Ammon, quam de Philisthiim et Amalec.
v. 12 : Abisai vero filius Sarviae percussit Edom in valle Salinarum, decem et octo millia:
v. 13 : et constituit in Edom praesidium, ut serviret Idumaea David: salvavitque Dominus David in cunctis ad quae perrexerat.
v. 14 : Regnavit ergo David super universum Israel, et faciebat iudicium atque iustitiam cuncto populo suo.
v. 15 : Porro Ioab filius Sarviae erat super exercitum, et Iosaphat filius Ahilud a commentariis:
v. 16 : Sadoc autem filius Achitob, et Ahimelech filius Abiathar, sacerdotes: et Susa, scriba:
v. 17 : Banaias quoque filius Ioiadae super legiones Cerethi et Phelethi: porro filii David, primi ad manum regis.