v. 1 : Igitur David, senex et plenus dierum, regem constituit Salomonem filium suum super Israel.
v. 2 : Et congregavit omnes principes Israel, et sacerdotes atque Levitas.
v. 3 : Numeratique sunt Levitae a triginta annis et supra: et inventa sunt triginta octo millia virorum.
v. 4 : Ex his electi sunt, et distributi in ministerium domus Domini, viginti quatuor millia: praepositorum autem et iudicum, sex millia.
v. 5 : Porro quatuor millia ianitores, et totidem psaltae, canentes Domino in organis quae fecerat ad canendum.
v. 6 : Et distribuit eos David per vices filiorum Levi, Gerson videlicet, et Caath, et Merari.
v. 7 : Filii Gerson: Leedan, et Semei.
v. 8 : Filii Leedan: princeps Iahiel, et Zethan, et Ioel, tres.
v. 9 : Filii Semei: Salomith, et Hosiel, et Aran, tres: isti principes familiarum Leedan.
v. 10 : Porro filii Semei: Leheth, et Ziza, et Iaus, et Baria: isti filii Semei, quatuor.
v. 11 : Erat autem Leheth prior, Ziza secundus: porro Iaus et Baria non habuerunt plurimos filios, et idcirco in una familia, unaque domo computati sunt.
v. 12 : Filii Caath: Amram, et Isaar, Hebron, et Oziel, quatuor.
v. 13 : Filii Amram: Aaron et Moyses. Separatusque est Aaron ut ministraret in Sancto sanctorum, ipse et filii eius in sempiternum, et adoleret incensum Domino secundum ritum suum, ac benediceret nomini eius in perpetuum.
v. 14 : Moysi quoque hominis Dei filii annumerati sunt in tribu Levi.
v. 15 : Filii Moysi: Gersom et Eliezer.
v. 16 : Filii Gersom: Subuel primus.
v. 17 : Fuerunt autem filii Eliezer: Rohobia primus: et non erant Eliezer filii alii. Porro filii Rohobia multiplicati sunt nimis.
v. 18 : Filii Isaar: Salomith primus.
v. 19 : Filii Hebron: Ieriau primus, Amarias secundus, Iahaziel tertius, Iecmaam quartus.
v. 20 : Filii Oziel: Micha primus, Iesia secundus.
v. 21 : Filii Merari: Moholi, et Musi. Filii Moholi: Eleazar et Cis.
v. 22 : Mortuus est autem Eleazar, et non habuit filios, sed filias: acceperuntque eas filii Cis fratres earum.
v. 23 : Filii Musi: Moholi, et Eder, et Ierimoth, tres.
v. 24 : Hi filii Levi in cognationibus et familiis suis, principes per vices, et numerum capitum singulorum qui faciebant opera ministerii domus Domini, a viginti annis et supra.
v. 25 : Dixit enim David: Requiem dedit Dominus Deus Israel populo suo, et habitationem Ierusalem usque in aeternum.
v. 26 : Nec erit officii Levitarum ut ultra portent tabernaculum et omnia vasa eius ad ministrandum.
v. 27 : Iuxta praecepta quoque David novissima, supputabitur numerus filiorum Levi a viginti annis et supra.
v. 28 : Et erunt sub manu filiorum Aaron in cultum domus Domini, in vestibulis, et in exedris, et in loco purificationis, et in sanctuario, et in universis operibus ministerii templi Domini.
v. 29 : Sacerdotes autem, super panes propositionis, et ad similae sacrificium, et ad lagana azyma, et sartaginem, et ad torrendum, et super omne pondus atque mensuram.
v. 30 : Levitae vero ut stent mane ad confitendum et canendum Domino: similiterque ad vesperam,
v. 31 : tam in oblatione holocaustorum Domini, quam in sabbatis et calendis et solemnitatibus reliquis iuxta numerum et caeremonias uniuscuiusque rei, iugiter coram Domino.
v. 32 : Et custodiant observationes tabernaculi foederis, et ritum sanctuarii, et observationem filiorum Aaron fratrum suorum, ut ministrent in domo Domini.